တရုတ်အစိုးရပေါ်လစီနှင့် စီးပွားရေးကိုဆန့်ကျင်ကြ

ပြ
ည်သူ့ဆန္ဒကို ပြည်သူများကိုယ်စား ထုတ်ဖော်ပြသနေသော ဆရာတော်သံဃာတော်များအား နအဖ လက်နက်ကိုင် စစ်သားများ၊ ရဲများမှ သွေးထွက်သံယို နှိပ်ကွပ်ခြင်းဖြင့် သူတို့၏ရက်စက်သော သဘောထားကို ထုတ်ဖေါ်ပြသလိုက်သည်။ သံဃာတော်အပါး (၂၀၀) ကျော် (၃၀၀) နီးပါးခန့် အဖမ်းဆီးခံရသည်။ သံဃာတော် အနည်းဆုံး (၅) ပါး သေနတ်နှင့်အပစ်ခံရ၍ ပျံလွန်တော်မူသည်ဟုလည်း မနေ့ကသတင်းများအရ သိရသည်။ ငြိမ်းချမ်းစွာ မေတ္တာပို့သဆု တောင်းခြင်းကို အကြမ်းဖက်၍ စတင်နှိမ်နင်းပြီ ဟုဆိုနိုင်သည်။

သည်ကနေ့မနက်သတင်းများအရ ရန်ကုန်မြို့ရှိ သံဃာတော်များသီတင်းသုံး နေထိုင်သော ကျောင်းတိုက်များ အတွင်း စစ်သားများ ၀င်ရောက်စီး နင်းသည်ဟုလည်း ဆက်လက်ကြားသိရသည်။ ရိုင်းပြလွန်းလှသည်။ နိုင်ငံတကာမှ ယဉ်ကျေးသောအစိုးရများက မြန်မာစစ်ဗိုလ်များအား အကြမ်းဖက်နိမ်နှင်းခြင်းမပြုရန် ၀ိုင်းဝန်းတောင်းဆိုနေကြသည်။ သို့ သော် တရုတ်နှင့် ရုရှားအစိုးရတို့က မြန်မာပြည်ထဲတွင် ဖြစ်ပွားနေသည့် လက်ရှိအခြေအနေအား သူတို့နှင့်မဆိုင် ကာယကံရှင်နိုင်ငံ၏ ပြည်တွင်းရေးသာ ဖြစ်သည်ဟု တာဝန်ကင်းမဲ့စွာ ပြောဆိုလိုက်ကြသည်။



တရုတ်အစိုးရသည် ၁၉၈၈ ကတည်းက မြန်မာစစ်အစိုးရအား လက်နက်များ၊ စစ်သင်္ဘောများ၊ သံချပ်ကားများ၊ အစု လိုက်အပုံလိုက် ရောင်းချနေသောအစိုးရဖြစ်သည်။ အခုလည်း ဆက်လက်ရောင်းခြနေဆဲဖြစ်သည်။ တရုတ်အစိုးရထံ မှ ၀ယ်ယူထားသော လက်နက်များကို မြန်မာစစ်အစိုးရ လက်တွေ့အသုံးခြနေသည်။ နိုင်ငံတကာ အသိုင်းအ၀ိုင်းက စစ်အစိုးရကိုဝေဖန်တိုင်း တရုတ်အစိုးရက စစ်ဗိုလ်ချုပ်များအတွက် အကာအကွယ် ပေးနေသည်။ တချိန်တည်းတွင် မြန်မာပြည်က သယံဇာတများကို ဂုတ်သွေးစုတ်၍ ရသမျအကုန်ယူနေသည်။ စစ်အစိုးရဘာတွေ ကျူးလွန် ကျူးလွန် အကာအကွယ်ပေးဖို့ တရုတ်အစိုးရက အမြဲအသင့်ရှိနေသည်။

တရုတ်အစိုးရကို နိုင်ငံတကာမှ ပြည်သူများဝိုင်းဝန်း ဆန့်ကျင်ရန်အချိန် ကြပေပြီ။ ထို့အတွက် နိုင်ငံတကာရောက် မြန်မာများအနေဖြင့် တိဗက်အရေးလှုပ်ရှားနေသော တိဗက်အဖွဲ့အစည်းများ၊ ဆူဒန်အရေးအတွက် တရုတ်အစိုးရကို ဆန့်ကျင်လှုပ်ရှားနေသော အာဖရိကန်အဖွဲ့အစည်းများ ဖြင့်ပူးပေါင်းလုပ်ကိုင်ဖို့ အကြံပေးလိုသည်။ ၁၉၈၉ တီရန်နန် မင် လှုပ်ရှားမှုမှ ပေါက်ဖွားလာသော အဝေးရောက် ဒီမိုကရက်တစ်တရုတ် အဖွဲ့အစည်းများဖြင့် ဆက်သွယ်ပူးပေါင်း ဆောင်ရွက်ရန် လည်းလိုသည်။ နိုင်ငံတကာရောက် မျိုးချစ်မြန်မာများ စတင်ဆောင်ရွက်လှုပ်ရှားနေသည့် တရုတ် ကုန်ပစ္စည်းများကို သပိတ်မှောက်ရေးအား ပိုမိုအားကောင်းလာစေရန် အားလုံးပူးပေါင်း ဆောင်ရွက်ဖို့လည်း အထူး လိုအပ်သည်။

တရုတ်အစိုးရ၏ အကာကွယ်အားကိုးဖြင့် မြန်မာစစ်အစိုးရသည် ဘယ်သူ့မှလူမထင် ဆိုသည့် အပေါက်ကို ချိုးနေသည်။ တရုတ်အစိုးရသည် စီးပွားရေးအထူးတိုးတက် လာနေသည့် နိုင်ငံကြီးဖြစ်သည်။ သူ့၏ နိုင်ငံတိုးတက်ရေး အတွက် နိုင်ငံငယ်များကို ဂုတ်သွေးစုတ်နေသည်။ နိုင်ငံငယ်များက အာဏာရှင်များကို နောက်ကွယ်မှတမျိုး၊ ပြောင်ကျကျ တမျိုး ပံ့ပိုးနေသည်။ တိုးတက်လာနေသည့် အင်အားကြီး နိုင်ငံ ဖြစ်သော်လည်း နိုင်ငံတကာပြည်သူများ ပူးပေါင်းမှု ဖြင့် တရုတ်အစိုးရကို ရပ်တန်းကရပ်ဖို့သတိ ပေးရန်လိုသည်။ တရုတ်အစိုးရ၏ စီးပွားရေးလက်တံများကို နှောက်ယှက် ရမည်။ နိုင်ငံတကာတွင် ရောင်းချနေသော တရုတ်နိုင်ငံထုတ် ကုန်ပစ္စည်းများကို ၀ယ်ယူအားပေးခြင်းမပြုရန် ကမ္ဘာအနှံ့ ဆောင်ရွက်ဆော်သြရမည်။ တရုတ် ကုန်ပစ္စည်းမှန်သမျ သပိတ်မှောက်ရန် အတွက် စတင်ကြပါစို့။

ဇော်မင်း (လူ့ဘောင်သစ်)
၂၇ ရက် စက်တင်ဘာလ ၂၀၀၇ ခုနှစ်