ဆက်သွယ်ရေး ဧရိယာပြင်ပတွင်

"
လူကြီးမင်းခေါ်ဆိုသော ဖုန်းမှာ ဆက်သွယ်ရေးဧရိယာပြင်ပတွင် ရောက်ရှိနေပါသဖြင့်" စသည့် အသံမျိုးကို မြန်မာ အများစု ကြားဖူးကြပါလိမ့်မည်။ မြန်မာနိုင်ငံရှိ လက်ကိုင်ဖုန်း၊ တယ်လီဖုန်းအများစုက သာမန်အချိန်တွင်ပင် ကောင်း ကောင်း ဆက်သွယ်၍ မရတတ်ကြပါ။ ယခုလို မုန်တိုင်းတိုက်ပြီး ကာလတွင် ဆက်သွယ်ရေးကိစ္စများက ပို၍ ဆိုးပါ တော့သည်။

စစ်အစိုးရ ၀န်ကြီးချုပ် ဗိုလ်ချုပ်သိန်းစိန်က ကယ်ဆယ်ရေးလုပ်ငန်းများ ပြီးဆုံးခဲ့ပြီ၊ ပြန်လည်ထူထောင်ရေး လုပ်ငန်းများ စတော့မည်ဟု ထိုင်းဝန်ကြီးချုပ်ကို ပြောခဲ့သည်။ ယုံကြည်ရ ခပ်ခက်ခက်ပင် ဖြစ်သည်။ အခြားသတင်းများတွင် ပြဿနာ များက မကြားချင်မှအဆုံး။ အကူအညီများ ဖြန့်ဖြူးပို့ဆောင်ရန်အတွက် အတတ်ပညာ၊ နည်းပညာ၊ ကျွမ်းကျင်မှု၊ လူအင် အား သူတို့ထံတွင် ရှိသည်ဟု ဆိုသေးသည်။ နိုင်ငံတကာ အကူအညီပေးရေး လုပ်သားများ မလိုဟုလည်း ကန့်သတ်ပိတ်ပင်နေ သေးသည်။ သို့သော်လည်း ၀န်ကြီးချုပ်ဆိုသူ ဗိုလ်ချုပ်သိန်းစိန်ကိုယ်တိုင် ဦးဆောင်ခန့်ခွဲနေသည့် အမျိုးသား သဘာဝဘေး ကာကွယ်စောင့်ရှောက်ရေး ဗဟိုကော်မတီ၏ စီမံခန့်ခွဲမှုများတွင်ပင် ကမောက်ကမဖြစ်ရပ်များ၊ လိုအပ်ချက်များ အများ အပြားတွေ့နေရပါသည်။

အခြားကိစ္စများ ထားဦး။ ဆက်သွယ်ရေးကိစ္စတခုကိုပင် ကြည့်၍ မိမိထောက်ပြလိုသေးသည်။ ယခုလို ကပ်ဘေးဒုက္ခကြီးက မြန်မာနိုင်ငံ အတွက်သာ မဟုတ်။ ကမ္ဘာအတွက်ပါ အတန်ကြီးမားသည့်၊ လူအသေအပျောက် များပြားလွန်းလှသည့် ကပ် ဘေးဒုက္ခကြီး ဖြစ်သည်။ ဤသဘာဝကပ်ဘေးကို နိုင်ငံတကာ အစိုးရများနှင့် ပြည်သူများက စိုးရိမ်ပူပန်နေကြပါသည်။ သတင်းထူးခြားချက်များကို သိလိုနေကြသည်။ မြန်မာလူမျိုးများအတွက် ဆိုလျှင် ကြိမ်မီးအုံးမျှ၊ ဆွေမျိုး မိတ်ဆွေများ အတွက် ပူပန်ကြသည်။ နိုင်ငံသား မိမိလူမျိုးအချင်းချင်းအတွက် ပူပန်နေကြပါသည်။ မိမိကိုယ်တိုင်ပင် ရန်ကုန်မြို့ရှိ မိသားစုများကိုပင် ယခုတိုင် ဆက်သွယ်၍ မရသေးပါ။

ဤအခြေအနေတွင် နိုင်ငံတကာ သတင်းဌာနများနှင့် နိုင်ငံတကာအဖွဲ့အစည်းများအတွက် "ပြောရေးဆိုခွင့်ရှိသူ" မထား ရှိပါ။ သတင်းပြန်ကြားထုတ်ပြန်ပေးနေမည့် ဌာနမျိုး သူတို့ဖွဲ့စည်းထားသည်ဆိုသည့် အမျိုးသား သဘာဝဘေး ကာကွယ် စောင့် ရှောက်ရေး ဗဟိုကော်မတီတွင် ရှိမနေပါ။ ယခင်က ကုလအထူးသံ ဂမ်ဘာရီလာစဉ်က ထွက်ထွက်ပြောနေသည့် "ပြောရေး ဆိုခွင့် အာဏာပိုင်အဖွဲ့" က မည်သည့်နေရာ ရောက်နေမှန်း မသိရပါ။ နေ့စဉ် သတင်းစာရှင်းလင်းပွဲများလည်း မတွေ့ကြရပါ။ ဤကိစ္စများ ထားလိုက်ဦး။ မိမိတို့ တဦးချင်း မေးမြန်းစုံစမ်းနိုင်မည့် ဟော့လိုင်း (Hotline) ခေါ် ဆက်သွယ် စုံစမ်းမေးမြန်း နိုင်မည့် ဌာနများလည်း ဖွဲ့စည်းထားရှိခြင်း မရှိပါ။

ဤကိစ္စမျိုးက အစိုးရတခုအတွက် ခက်လှသည်ဟု မထင်ပါ။ သို့မဟုတ် သာမန် အဲန်ဂျီအိုအဖွဲ့အစည်းတခုကပင် ဆောင်ရွက် နိုင်သည့် လုပ်ငန်းမျိုး ဖြစ်ပါသည်။ ဥပမာ- နိုင်ငံရပ်ခြားတွင် ရှိနေသည့် ဆွေမျိုးသားချင်းများက မြန်မာနိုင်ငံရှိ အရေးပေါ်ဖုန်း (Hotline) နံပါတ်တခုကို ဆက်သွယ်မည်။ ဆွေမျိုး မိတ်ဆွေများ ဘေးအန္တရာယ်ကင်းလွတ်-မလွတ် စုံစမ်း နိုင်မည်။ အပြန် အလှန် ဆက်သွယ်နိုင်မည်။ အကူအညီလိုအပ်ပါကလည်း အကူအညီ ပေးနိုင်ပါလိမ့်မည်။ ဖုန်းလိုင်းကြိုး များပြတ်တောက် နေသည့် အထူးသဖြင့် ယခုလိုကာလတွင် ဤကဲ့သို့ ၀န်ဆောင်မှုမျိုးက အထူးလိုအပ်ပါသည်။ ဤဌာန တွင် စေတနာ့ဝန်ထမ်း အများအပြား ထားရှိနိုင်ပြီး ထိုသူများက လူကိုယ်တိုင်သွားရောက်စုံစမ်းပေးခြင်း၊ ပြန်ကြားပေးခြင်း၊ ရှာဖွေပေးခြင်းများလည်း ပြုနိုင်ပါလိမ့်မည်။ ဥပမာ-ဆိုပါစို့။ လပွတ္တာရှိ လူတဦးက အခြားဒေသရှိ မိတ်ဆွေ၊ ဆွေမျိုးများ ရှိနေပါက အကူအညီ တောင်းခံ နိုင်မည့်အပြင်၊ အခြားဒေသရှိ သူများကလည်း ကပ်ဘေးသင့် ဒေသရှိ မိမိတို့ အသိအကျွမ်း များကို ဆက်သွယ်ပေးနိုင်လိမ့်မည်။ အပြန်အလှန် ကူညီပေးနိုင်ကြပါလိမ့်မည်။ "ကျန်းမာ သက်ရှင် ရှိနေကြောင်း" သိရ၍ သက်ပြင်း သက်မ ချနိုင်ပါလိမ့်မည်။ သို့သော် ယခု ၁၉ ရက် တိုင်လာသည့်တိုင် ဤကဲ့သို့ ၀န်ဆောင်ကူညီပေးမှုမျိုး မတွေ့ရ ပါ။ (BBC) မြန်မာပိုင်းဌာနက တတ်နိုင် သမျှ ၀န်ဆောင်မှုပေးနေသော်လည်း အစိုးရပိုင် ရုပ်မြင်သံကြား၊ ရေဒီယို၊ သတင်းစာ များက အလားတူဝန်ဆောင်မှုမျိုး လုပ်ဆောင်ပေးခြင်း မရှိပါ။

ဤသို့ဖြင့် ယခုတိုင် မိမိဖုန်းဆက်တိုင်း ဆက်သွယ်ရေး ဧရိယာပြင်ပသို့ ရောက်နေသည်ကို ကြုံနေရပါသည်။ ရန်ကုန်မြို့ကြီး ရှိ လူထုများလည်း ဆက်သွယ်ရေး ဧရိယာပြင်ပသို့ ရောက်နေကြရပါသည်။ ကပ်ဘေးသင့်ဒေသရှိ သန်းနှင့်ချီသည့် အိုး အိမ်မဲ့ ဒုက္ခသည်များသည်လည်း ဆက်သွယ်ရေး ဧရိယာပြင်ပသို့ ရောက်နေကြပါသည်။ နောက်ဆုံး စစ်အစိုးရက လူလူ ချင်းစာနာမှု ကင်းမဲ့စွာ နိုင်ငံတကာ အကူအညီများကို ကန့်သတ်ပိတ်ပင်ထားသောကြောင့် မြန်မာတနိုင်ငံလုံးသည်ပင် ဆက်သွယ်ရေး ဧရိယာပြင်ပသို့ ရောက်နေကြရပါသည်။

ယခုလို အကူအညီပေးရေးကိစ္စတွင်ပင် နိုင်ငံတကာနှင့် ဆက်ဆံရေး မည်မျှညံ့ဖျင်း၍ စစ်အစိုးရ၏ စဉ်းစားချက်များ မည်မျှ ခေတ်နောက်ပြန်ဆွဲနေသည်ကို တွေ့နေကြရပါသည်။ အာဆီယံနိုင်ငံများမှ အကူအညီအဖွဲ့များကိုသာ ရွေး၍ လက်ခံမည်။ အနောက်နိုင်ငံများကို မယုံသင်္ကာစိတ်နှင့် ပယ်ထားသည်ကို တွေ့နေရပါသည်။ စစ်အစိုးရ၏ ကမ္ဘာ့အမြင်ကိုပါ ဆက်၍ တွက်ဆနိုင်သေးသည်။ ဤသို့သော ကမ္ဘာ့အမြင်မျိုးဖြင့် မည်သို့ နိုင်ငံတကာနှင့် ကုန်သွယ်ကြပါမည်နည်း။ မည်သို့ စီးပွား ရေး ပူးပေါင်းဆောင်ရွက်ကြပါမည်နည်း။ ဤသို့စီမံခန့်ခွဲပုံမျိုးနှင့် ဆိုလျှင် အာဆီယံနိုင်ငံများနှင့်သာ ကုန်သွယ်စီးပွား လုပ်ကြတော့ မည်လော။ အနောက်နိုင်ငံများနှင့် ကုန်သွယ် ဆက်ဆံ မလုပ်ကြတော့ပြီလော၊ စဉ်းစားဖွယ် ဖြစ်လာပါသည်။ ပို၍ အကျယ် အပြန့်စဉ်းစားလျှင် စစ်အစိုးရက ကမ္ဘာလွှမ်းပတ်ဆက်သွယ်မှု (ဂလိုဘယ်လိုက်ဇေးရှင်း) မှပါ ဖယ်ခွါ၍ အထီး တည်း ကျင့်ကြံ နေပြီ ဆိုသည်ကိုပါ ပို၍ ပေါ်လွင်လာပါတော့သည်။ ဗိုလ်ချုပ်မှူးကြီးသန်းရွှေ ဦးဆောင်သည့် မြန်မာစစ် အစိုးရ ကိုယ်၌က ဂလိုဘယ်လိုက်ဇေးရှင်းခေတ်တွင် ဆက်သွယ်ရေး ဧရိယာပြင်ပသို့ ရောက်နေသည်ကို တွေ့ကြရပါတော့ သည်။

ဤနေရာတွင် သောမတ်စ် ပီ ဘာနေး (Thomas P. M. Barnett) ဆိုသူပညာရှင်တဦး၏ တင်ပြချက်က စိတ်ဝင်စားဖွယ် ကောင်းလှပါသည်။ သူက အမေရိကန်ပြည်ထောင်စု ရေတပ်မတော် စစ်ရေးကောလိပ်မှ ပါမောက္ခတဦးဖြစ်ပြီး သူရေးသား ခဲ့သည့် "ပင်တဂွန်စစ်ဌာနချုပ်၏ နောက်ဆုံးကမ္ဘာ့မြေပုံ၊ ၂၁ ရာစုတွင် စစ်နှင့် ငြိမ်းချမ်းရေးအကြောင်း" (Pentagon's New Map: War and Peace in the Twenty-First Century) စာအုပ်က လူသိများလှပါသည်။ သူက အမေရိကန်နိုင်ငံ ၀င်ရောက်စွက်ဖက်ခဲ့ရသည့် စစ်ပွဲများနှင့် ဂလိုဘယ်လိုက်ဇေးရှင်း သဘောတရားကို ဆက်စပ်တင်ပြထားခြင်းဖြစ်သည်။ သူက ပြောရာတွင် ဒုတိယကမ္ဘာစစ် ပြီးချိန်မှစ၍ အမေရိကန်က အခြား အင်အားတူ၊ အင်အားကြီးနိုင်ငံများနှင့် စစ်ဆိုင်ရန် ပြင်ဆင်ခဲ့ရသည်။ သို့သော်လည်း ပြီးခဲ့သည့် နှစ်များအတွင်း အမေရိကန်နိုင်ငံက ၀င်ရောက်စွက်ဖက်ခဲ့ရသည့် စစ်ပွဲများကို ပြန်ကြည့်သောအခါ အခြားကမ္ဘာနှင့် မဆက်စပ်နေသည့်၊ တနည်း ဂလိုဘယ်လိုက်ဇေးရှင်းနှင့် ဝေးကွာ ဖယ်ခွါနေသည့် နိုင်ငံများတွင်သာ ဖြစ်ပေါ်ခဲ့ရသည်ကို သူတွေ့ရှိရသည်။

သူက ကမ္ဘာ့မြေပုံတွင် ဂလိုဘယ်လိုက်ဇေးရှင်းနှင့် ထဲထဲဝင်ဝင် ပေါင်းစပ်နေသည့် နိုင်ငံများကို ဖော်ပြသည်။ ဤနိုင်ငံများက စီးပွားရေးစနစ်အရ၊ အုပ်ချုပ်ရေးအရ၊ ဒီမိုကရေစီအရ ကောင်းမွန်စွာ လည်ပတ်ရှင်သန်နေသော နိုင်ငံများဖြစ်သည်။ သူ၏ အခေါ်အရ ဤနိုင်ငံများကို ဗဟိုချက်မ နိုင်ငံ (core)၊ တနည်း ရှင်သန်လည်ပတ်နေသည့် ချက်မ (functioning core) ဟု သုံးသည်။ ကျန်သည့်နိုင်ငံများကတော့ ဂလိုဘယ်လိုက်ဇေးရှင်းနှင့် မဆက်စပ်နိုင်ကြသော နိုင်ငံများဖြစ်ပြီး ၎င်းတို့ကို မချိတ်ဆက်မိသည့် ချောက်ကမ်းပါး (non-integrating gap) သို့ ကွာဟနေသည့် ကွက်လပ် (gap) ဟု ခေါ်သည်။ ဤနိုင်ငံ များတွင် ကာရစ်ဘီယန်ပင်လယ်အော်ရှိနိုင်ငံများ၊ အာဖရိကတိုက်ရှိ နိုင်ငံအားလုံးနီးပါး၊ ဘောလ်ကန်ဒေသ၊ ကော့ကေးဆပ် ဒေသ၊ အလယ်ပိုင်းအာရှ၊ အရှေ့အလယ်ပိုင်းနှင့် အရှေ့တောင်အာရှ၊ အနောက်တောင်အာရှဒေသရှိ နိုင်ငံ များ ပါဝင်နေကြ သည်ဟု ဆိုသည်။ သူ၏ သဘောတရားအရ "(ဂလိုဘယ်လိုက်ဇေးရှင်းနှင့် ချိတ်ဆက်ထားမှုမရှိသော (နိုင်ငံများ) သည် အန္တရာယ်ရှိနေသည်" (Disconnectedness defines .) ဟု ဆိုသည်။

ဘာနေး၏ အဆိုအရ ဂလိုဘယ်လိုက်ဇေးရှင်းနှင့် ဝေးသည့် နိုင်ငံများသည် ဆင်းရဲကြသည်။ ဒီမိုကရေစီ မရှိကြ။ ကမ္ဘာ့၏ ယဉ်ကျေးသော လူ့တန်ဖိုးများကို လက်မခံကြ။ ပြဿနာ/ ပဋိပက္ခများလည်း ပြည့်နေကြသည်။ ဤသို့ဖြင့် ကြောင်လိမ် လှေခါးသဖွယ် ပြဿနာများဖြင့် တ၀ဲလည်လည် ဆင်းနေရင်း၊ နောက်ဆုံး အကျပ်အတည်းများက ကပ်ဆိုက်လာရသည်။ နိုင်ငံတကာမိသားစုက ၀င်မရှင်းလျှင် မရနိုင်တော့သည့် အနေ အထားမျိုး ဖြစ်လာခဲ့သည်ဟု ဆိုသည်။ ဤအယူအဆ အပေါ် အမေရိကန်ရေတပ်တွင်လည်း စက်တင်ဘာ ၁၁၊ နောက်ပိုင်းကာလတွင် အလေးအနက် ဆွေးနွေးမှုများရှိလာခဲ့ သည်ဟုလည်း ဖတ်ရဖူးသည်။

မြန်မာနိုင်ငံကလည်း အလားတူအခြေအနေမျိုး ဆိုက်လာခဲ့ပြီဟု ယူဆရသည်။ မြန်မာစစ်အစိုးရက အထီးကျန်ဝါဒ ကို ကျင့်သုံးနေရင်း ဂလိုဘယ်လိုက်ဇေးရှင်း၏ ဆက်သွယ်ရေးဧရိယာ ပြင်ပတွင် နေထိုင်လာခဲ့သည်မှာ ကြာပြီဖြစ်သည်။ ယခု နာဂစ်မုန်တိုင်းကာလ လူသားချင်းစာနာမှုဆိုင်ရာ ကပ်ဘေးကြီး ဆိုက်ရသည့်တိုင် အထီးကျန်ဝါဒကို ဆက်လက်ကိုင်စွဲဆဲ ဖြစ်နေသည်။ ဤသို့ ဆက်လက်နေထိုင်ရန် မဖြစ်နိုင်ပါ။ မရှုမကယ်နိုင်နှင့် နိုင်ငံတကာက ၀င်ရောက်ကယ်ဆယ်ရတော့ မည့် အခြေအနေသို့ ဆိုက်လာခဲ့ပြီ။ သို့သော် စစ်အစိုးရက ခေါင်းမာမာဖြင့် ငြင်းပယ်နေဆဲ။

သေချာသည့်အချက် တခုတော့ရှိပါသည်။ ဂလိုဘယ်လိုက်ဇေးရှင်း၏ ဆက်သွယ်ရေးဧရိယာ ပြင်ပတွင်နေထိုင်၍ စစ်အစိုးရ ပြော ပြောနေသည့် "ခေတ်မီ ဖွံ့ဖြိုးတိုးတက်သည့် နိုင်ငံတော်ကြီး" ကို တည်ဆောက်နိုင်လိမ့်မည် မဟုတ်ပါ။

အောင်သူငြိမ်း
၂၁ မေလ ၂၀၀၈။