ရွက်မွန်စာမျက်နှာ

Friday, May 23, 2014

အရပ်ပုခြင်းနှင့် ဖွံ့ဖြိုးတိုးတက်ရေး

ဖွံ့
ဖြိုးတိုးတက်ရေး ဆိုတာကိုပြောတိုင်း မဖြစ်မနေ ထည့်သွင်းစဉ်းစားလာရတဲ့ ကိစ္စတခုကတော့ လူသားရင်းမြစ် ဖွံ့ဖြိုး လာတာကို ထည့်သွင်းတွက်ချက်ဖို့ လိုလာပါတယ်။ လူသားရင်းမြစ် ဖွံ့ဖြိုးလာဖို့ ဆိုတဲ့နေရာမှာလည်း ယေဘုယျအားဖြင့် နှစ်မျိုး ရှိပါတယ်။ ပထမတစ်မျိုးကတော့ အသိပညာ အတတ်ပညာဆိုတဲ့ ပညာတွေကို တတ်မြောက်ခြင်း ဖြစ်ပါတယ်။ ဒုတိယ တစ်ချက်ကတော့ ကိုယ်ကာယအားဖြင့် ဖွံ့ဖြိုးခြင်း ဆိုတာလည်း တစ်ချိန်ထဲမှာ ကပ်ပါနေပါတယ်။ ဒီတပတ်မှာ ပြောချင်တဲ့ ကိစ္စကတော့ ဒုတိယအမျိုးအစားဖြစ်တဲ့ ကိုယ်ကာယ ဖွံ့ဖြိုးတိုးတက်ခြင်း၊ ကျန်းမာသန်စွမ်းခြင်း အကြောင်းပါ။

မြန်မာနိုင်ငံသားတွေရဲ့ ကိုယ်ကာယ ဖွံ့ဖြိုးတိုးတက်မှု ကောင်းမွန်ပါရဲ့လား။ မြန်မာနိုင်ငံသားတွေ သန်မာထွားကြိုင်း ပါသလား။ အားမနာတန်း ပြောရရင်တော့ မြန်မာနိုင်ငံသားတွေရဲ့ ကာယဖွံ့ဖြိုးမှုဟာ နောက်ကျကျန်နေရစ်ပါတယ်။ မြန်မာနိုင်ငံသားတွေ တဖြည်းဖြည်းနဲ့ အရပ်အမောင်း ပုသထက် ပုလာတာကို လက်တွေ့မြင်နေရပါတယ်။ လူလုံးလူဖန် သေးသေးကွေးကွေး ဖြစ်လာနေပါတယ်။ ငွေကြေးတတ်နိုင်တဲ့ မိသားစုက ပေါက်ဖွားလာတဲ့ လူငယ်တချို့ကတော့ ထောင်ထောင်မောင်းမောင်း ရှိပါတယ်။ ဒါပေမဲ့ နိုင်ငံတစ်ဝှမ်းလုံး လူဦးရေနဲ့ ချိန်ထိုးလိုက်ရင် အဲတာက လူနည်းစုသာ ဖြစ်ပါတယ်။ မြန်မာတွေ ပုကုန်ပါပြီ။
မိတ်ဆွေတဦးရဲ့ တူမလေးတစ်ယောက်က စင်္ကာပူမှာ အလုပ်လုပ်ပါတယ်။ အလုပ်ကခွင့်ယူပြီး ပြန်လာတဲ့အချိန်မှာ မိတ်ဆွေရဲ့ အိမ်မှာ ဆုံလိုက်ရပါတယ်။ အဲဒီ မိန်းကလေးက ခေတ်ပညာတတ် မိန်းကလေးတဦးပါ။ ပြုံးပြုံးရွှင်ရွှင် ချက်ချက်ခြာခြာ ရှိပါတယ်။ စကားပြောကြည့်လိုက်တော့ အဲဒီကလေးမလေးဟာ ဉာဏ်လည်း အတော်ကောင်းပုံရပါတယ်။ သမီးအသက်ဘယ်လောက် ရှိပြီလဲမေးတော့ သုံးဆယ်လို့ ပြောပါတယ်။ အချိန်နဲ့ပြောရမယ်ဆိုရင် အဲဒီမိန်းကလေးဟာ ၁၉၈၄ ခုနှစ်မှာ မွေးဖွားခဲ့တယ်လို့ ဆိုရမှာပေါ့။ သုံးဆယ်ဆိုတာ မငယ်တော့တဲ့ အရွယ်ပါ။ အိမ်ထောင်သားမွေး ပြုမယ် ဆိုရင် အရွယ်ကောင်းတဲ့ အချိန်လို့ ဆိုရမှာပါပဲ။ သို့သော် ကလေးမလေးဟာ အတော်လေး အရပ်ပုပါတယ်။ ငါးပေတောင် မပြည့်ပါဘူး။ ရှိလှမှ လေးပေ ကိုးလက်မလောက်ပဲ ရှိပါတယ်။ ခန္ဓာကိုယ်ကလည်း ပါးပါးလှပ်လှပ်လေး ဖြစ်နေပါတယ်။

အခုခေတ်မှာ တွေ့ရတဲ့ မြန်မာအမျိုးသမီးငယ် အများစုဟာ အထက်ကပြောခဲ့တဲ့ မိန်းကလေးလို သေးသေးကွေးကွေး လေးတွေ ဖြစ်နေတာ စိတ်မကောင်းဖွယ်ရာ မြင်နေရပါတယ်။ အဲတာဆိုရင် ယောက်ျားလေးတွေကကော အရပ်မြင့် သလားဆိုတာ့ ဒီဖက်ခေတ် မျိုးဆက်တွေဟာ အရပ်မမြင့်တဲ့အပြင် အရပ်ပုလာတယ်လို့ ဆိုနိုင်ပါတယ်။ ပြင်ဦးလွင် စစ်တက္ကသိုလ်က ဗိုလ်လောင်းတွေကို မြင်လိုက်ရတော့ မြန်မာအမျိုးသားတွေအတွက်လည်း စိတ်မကောင်း ဖြစ်ရပြန်ပါ တယ်။ ဗိုလ်လောင်း အများစုဟာ အရပ်ပုနေပြီး ခန္ဓြွာကိုယ် တည်ဆောက်ပုံကလည်း သေးသေးကွေးကွေးပါ။ နောင်မှာ ထောင်ထောင်မောင်းမောင်း စစ်သားကြီးတွေ မြန်မာ့တပ်မတော်ထဲမှာ ရှိပါဦးမလားလို့ ရင်လေးမိပြန်ပါတယ်။

နှစ်အတော်ကြာ လေ့ကျင့်ပေးပြီးမှ ဖြစ်လာရတဲ့ စစ်သားကြီးတွေ စစ်ဗိုလ်ကြီးတွေ ကိုယ်တိုင်ကမှ ထောင်ထောင် မောင်းမောင်း မရှိဘူးဆိုရင် အရပ်သူအရပ်သား များအတွက်တော့ ဝေးရောပဲလို့ ဆိုရတော့မှာပါ။ ပြောရရင် ကာချုပ်ဖြစ်တဲ့ ဗိုလ်ချုပ်မှူးကြီးကိုယ်တိုင်တောင် အရပ်အမောင်း ကောင်းသူမဟုတ်တာ တွေ့ရပါတယ်။

မြန်မာတွေ ဘယ်အချိန်လောက် ကတည်းက အရပ်အမောင်း ပုလာနေပါသလဲ။ အရပ်မြင့်တာ အရပ်ပုတာ ခန္ဓွာကိုယ် ထွားကြိုင်းတာကို သုတေသနပြုနေတဲ့ ပညာရှင်မဟုတ်တော့ စာရေးသူကိုယ်တိုင် သုတေသနဆန်ဆန် စနစ်တကျ တင်ပြဖို့ အခက်အခဲ ရှိပါတယ်။ ဒါပေမဲ့ မြန်မာတွေ အမျိုးသားရော အမျိုးသမီးပါ အရပ်အမောင်း ပုလာတယ် ဆိုတာက တော့ အားလုံး အမြင်ပါပဲ။

သမိုင်းစာအုပ်များထဲက မှတ်မိနေတာ တချို့ရှိပါတယ်။ ၁၈ ရာစုခေတ်တုန်းက အလောင်းမင်းတရားကြီး ဦးအောင်ဇေယျနဲ့ တွေ့ဆုံခွင့်ရခဲ့တဲ့ အနောက်တိုင်းသံတမန် တဦးက သူရဲ့ မှတ်တမ်းထဲမှာ ဒီလိုရေးထားပါတယ်။ အလောင်းမင်းတရား ကြီးဟာ ခန္ဓာကိုယ် ကြံ့ခိုင်ပြီး အရပ်အရှည် ငါးပေဆယ့်တလက်မခန့် ရှိတယ်လို့ ဆိုထားပါတယ်။ တစ်ခါ မြန်မာမှတ်တမ်း များအရ အလောင်းမင်းတရားကြီးရဲ့ မြင်းရည်တက် ခြောက်ကျိပ်ရှစ်ယောက်ဟာ ထွားထွားကြိုင်းကြိုင်း သန်သန်မာမာ ရှိသူများ ဖြစ်တယ်လို့ ဆိုထားပါတယ်။ အဲဒီအထဲက ဗိုလ်တွန် လို့ခေါ်တဲ့ မင်းခေါင်ကျော်ထင်နော်ရထာဟာ အရပ်အမြင့် “လေးတောင်” ရှိပြီး လက်မောင်းရင်း အတုတ်ဟာ “သုံးထွာ” လုံးပတ် ရှိတယ်လို့ သိရပါတယ်။ မြန်မာအတိုင်းအထွာ လေးတောင်ဟာ အင်္ဂလိပ်အတိုင်းအထွာ ခြောက်ပေနဲ့ ညီမျှပါတယ်။ အဲဒီခေတ် မြန်မာတွေအများစုဟာ အရပ်အမောင်း ကောင်းတယ်လို့ ဆိုနိုင်ပါတယ်။ အဲဒီ အနောက်တိုင်းသံတမန်ရဲ့ မှတ်တမ်းထဲမှာ မြန်မာတွေဟာ သိသိသာသာကြီး အရပ်ပုလှတယ်လို့ မှတ်ချက်ချထားမျိုး မတွေ့ရပါဘူး။

ကုန်းဘောင်မင်းဆက်ရဲ့ ဒုတိယ နောက်ဆုံးဘုရင်ဖြစ်တဲ့ မင်းတုန်းမင်းကြီး လက်ထက်မှာ ကင်းဝန်မင်းကြီး ဦးကောင်းကို ခေါင်းဆောင်စေပြီး သံအဖွဲ့တခု အင်္ဂလန်ကို စေလွှတ်ခဲ့ပါတယ်။ အဲဒါက ၁၉ ရာစုထဲမှာ ဖြစ်ပါတယ်။ မြန်မာသက္ကရာဇ်အရ ၁၂၃၃ ခုနှစ်လို့ မှတ်သားမိပါတယ်။ အခုကာလက မြန်မာနှစ်အရ ၁၃၇၆ ခုနှစ်ဆိုတော့ ကင်းဝန်မင်းကြီး အင်္ဂလန်ကို သွားခဲ့တာ လွန်ခဲ့တဲ့ ၁၄၃ နှစ်က ဖြစ်ပါတယ်။ အင်္ဂလိပ်သက္ကရာဇ်အရ ၁၈၇၁ ခုနှစ်မှာ သွားခဲ့တယ်လို့ ပြောနိုင်ပါတယ်။ အင်္ဂလိပ်မှတ်တမ်းများအရ မြန်မာသံအဖွဲ့ခေါင်းဆောင်များနဲ့ လိုက်ပါလာတဲ့ ဘုရင့်ဝန်ထမ်းများရဲ့ ပုံပန်းသဏ္ဌာန်ကို ဒီလို ဆိုထားပါတယ်။ မြန်မာလူမျိုးတို့ဟာ အသားညိုပြီး လူလုံးလူဖန် သေးသွယ်တယ်၊ အရပ်ပုတယ်လို့ ဆိုပါတယ်။ အဲဒီအချိန် ကာလဖြစ်တဲ့ ၁၈၇၁ ခုနှစ်မှာ မြန်မာတွေဟာ အရပ်ပုတယ်လို့ စတင်သတ်မှတ်ခံလာရပါပြီ။

သို့သော် အာရှတိုက်သားများထဲမှာတော့ မြန်မာတွေဟာ အဲဒီအချိန်မှာ ပုတယ်လို့ ပြောမရပါ။ ၁၉ ရာစုနဲ့ ၂ဝ ရာစု အလယ်လောက်အထိ ပုတယ်လို့ အများကသတ်မှတ်ထားတဲ့ လူမျိုးကတော့ ဂျပန်လူမျိုးတွေ ဖြစ်ပါတယ်။ ဂျပန်တွေနဲ့ နိုင်းစာရင် မြန်မာနိုင်ငံသားတွေဟာ အရပ်ရှည်ပါသေးတယ်။ မြန်မာနိုင်ငံမှာ ဂျပန်ခေတ်တုန်းက ဂျပန်တွေကို မြန်မာတွေက ငပုတွေလို့ ခေါ်ခဲ့တာ အားလုံးမှတ်မိကြမှာပါ။ ဂျပန်စစ်သားအများစုဟာ အရပ်ပုပါတယ်။ ဂျပန်ခေတ်ကို မီလိုက်တဲ့ လူကြီးများ အပြောအရ ဂျပန်စစ်သားတွေရဲ့ အရပ်အမောင်းဟာ ငါးပေနှစ်လက်မ၊ ငါးပေသုံးလက်မထက် မပိုဘူးလို့ ဆိုပါတယ်။ စကားစပ်မိလို့ ပြောရရင် ဒုတိယကမ္ဘာစစ်အပြီးမှာ အမေရိကန်နိုင်ငံက ပညာရှင်တွေက သုတေသနစစ်တန်း တခုပြုစုပါတယ်။ အဲဒီသုတေသနက ဘာကြောင့် ဂျပန်တွေ စစ်ရှုံးရသလဲ ဆိုတာကို လေ့လာထားတာပါ။ လေ့လာချက် များအရ ဂျပန်တို့ စစ်ရှုံးခဲ့ရတဲ့ အကြောင်းအရင်း စုစုပေါင်း အချက် တစ်ရာ ရှိတယ်ဆိုပါစို့။ အဲဒီ အကြောင်းအရင်း တစ်ရာထဲမှာ အရပ်ပုတာလည်း အချက်တစ်ချက်အနေနဲ့ ပါဝင်နေတယ်လို့ ဆိုထားပါတယ်။ မှတ်သားစရာပါ။

အခုခေတ်မှာတော့ ပြောင်းပြန်ဖြစ်ကုန်ပါပြီ။ ဂျပန်လူမျိုးတွေ အရပ်ရှည်လာပါတယ်။ စစ်ပြီးခေတ်မှာ မွေးလာခဲ့တဲ့ မျိုးဆက်သစ် ဂျပန်တွေဟာ အရပ်ရှည်လာပါတယ်။ အခု ၂၁ ရာစုထဲမှာတော့ ပိုလို့တောင် အရပ်မြင့်လာကြပါတယ်။ ဂျပန်ယောက်ျားတွေရဲ့ အနိမ့်ဆုံး ပျမ်းမျှအရပ်ဟာ အခုဆိုရင် ငါးပေခုနှစ်လက်မ၊ ငါးပေရှစ်လက်မ ဖြစ်ပါတယ်။ အသက်နှစ်ဆယ်ဝန်းကျင် ဂျပန်လူငယ် တွေရဲ့အရပ်အမောင်းဟာ ငါးပေဆယ်လက်မ၊ ခြောက်ပေ အထိ ရှိလာနေပါတယ်။ ဂျပန်တွေ မပုတော့ပါဘူး။ ဘာကြောင့်ပါလဲ။ စားသောက်ပုံစနစ်ကို ပြင်လိုက်လို့ ဖြစ်ပါတယ်။ ရှေးတုန်းက ဂျပန်တွေဟာ ငယ်ရွယ်စဉ်ကလေးဘဝ ကတည်းက ငါးကိုသာ အစားများခဲ့ပါတယ်။ အမဲသားတို့၊ နို့နဲ့ နို့ထွက်ပစ္စည်းတွေကို မစားသုံးခဲ့ပါဘူး။ အခုခေတ်မှာတော့ နို့နဲ့နို့ထွက်ပစ္စည်းတွေကို မွေးဖွားကတည်းက ကျွေးမွေးလာတာမို့ အရပ်အမောင်း တွေမြင့်၊ လူကောင်တွေ ကြီးလာခဲ့ပါပြီ။ ဒီလိုမျိုး ကျွေးမွေးလာနိုင် တာကလည်း စီးပွားရေး ဖွံ့ဖြိုးတိုးတက် လာတာကြောင့် ဖြစ်ပါတယ်။ ဆင်းရဲတွင်းနက်နက်ထဲမှာ နေထိုင်ရတာမျိုး မရှိတာက အဓိကအကြောင်းလို့ ဆိုနိုင်ပါတယ်။

အရပ်ရှည်တဲ့ လူမျိုးထဲမှာ အိမ်နီးချင်း တိုင်းပြည်တခုက လူတွေလည်း ပါပါသေးတယ်။ အဲတာကတော့ အိန္ဒိယနိုင်ငံပဲ ဖြစ်ပါတယ်။ ဟိန္ဒူလူများစုနေထိုင်တဲ့ တိုင်းပြည်ဖြစ်တာကြောင့် သက်သတ်လွတ်စားသူ များပါတယ်။ အမဲသားမစားပါ။ တခြားသော သားကြီးငါးကြီးလည်း မစားပါ။ ဒါပေမဲ့ နို့နဲ့နို့ထွက်ပစ္စည်းတွေ စားသုံးပါတယ်။ ဂျုံနဲ့ ပဲမျိုးစုံ စားသောက် ပါတယ်။ ဒါကြောင့် အိန္ဒိယနိုင်ငံသားအများစု ထွားကြိုင်းပြီး အရပ်ရှည်ကြပါတယ်။ အိန္ဒိယနိုင်ငံဟာ အခုအထိ ဆင်းရဲသားများနေဆဲ တိုင်းပြည်ဖြစ်ပါတယ်။ ဒါပေမဲ့ အစိုးရက နွားနို့ကို ပုံမှဈေးနှုန်းနဲ့ ဝယ်ယူစားသုံးနိုင်အောင် စီစဉ်ပေးထားတာကြောင့် လူတိုင်း လိုလို နို့ကို စားသုံးနိုင်ပါတယ်။ ပဲကတော့ ပရိုတန်းဓာတ် ကြွယ်ဝပြီး နေ့တိုင်းစားနေတဲ့ ဟင်းအမယ်ဖြစ်ပါတယ်။

နောက်ထပ်အိမ်နီးချင်းဖြစ်တဲ့ ထိုင်းနိုင်ငံမှာလည်း နောက်မွေးတဲ့ မျိုးဆက်သစ်လူငယ်များဟာ မိန်းကလေးရော ယောက်ျားလေးပါ အရပ်အမောင်း ကောင်းကြပါတယ်။ ကျောင်းတွေမှာပါ နွားနို့အခမဲ့ တိုက်တဲ့ အကျိုးကျေးဇူးကြောင့်လို့ ဆိုနိုင်ပါတယ်။ တခြား အိမ်နီးချင်း တိုင်းပြည်များမှာ ကျနော်တို့ မြန်မာတွေလို အရပ်ပုပြီး လူကောင်သေးနေတဲ့ နိုင်ငံများ ကတော့ ကမ္ဘောဒီးယားနဲ့ လာအို နိုင်ငံတို့ ဖြစ်ပါတယ်။ အမြင်မကျယ်တဲ့ ခေါင်းဆောင်တွေ တိုင်းပြည်အုပ်ချုပ် စီမံ ခန့်ခွဲနေတာ ဖြစ်တာကြောင့် နိုင်ငံသားတို့ ကြီးထွားကြံ့ခိုင်မှုကို ဦးစားမပေးပါ။ နိုင်ငံရေးအရလည်း အာဏာရှင်များ အုပ်ချုပ်နေဆဲ တိုင်းပြည်တွေ ဖြစ်ပါတယ်။ ကမေBာဒီးယားကတော့ ကျနော်တို့ တိုင်းပြည်နဲ့ ဆင်ပါတယ်။ ဒီမိုကရေစီ အရေခြုံသာ ဖြစ်တယ်လို့ ဆိုရမှာပါပဲ။

တကယ်တန်းတော့ မြန်မာလူမျိုးတွေဟာ ၁၉ ရာစုဝန်းကျင် ကတည်းက တဖြည်းဖြည်း အရပ်ပုတဲ့ဖက်ကို ရောက်လာ နေပါတယ်။ ၂ဝ ရာစု အလယ် လွတ်လပ်ရေး ရပြီးကထဲက ပြည်တွင်းစစ်နဲ့ နပန်းလုံး၊ စစ်အာဏာရှင်တွေ အနှစ် ငါးဆယ်ကျော် အုပ်ချုပ်၊ အဲသလို အကျိုးဆက်တွေကြောင့် ဆင်းရဲတွင်းက နက်သထက်နက်လာပါတယ်။ နိုင်ငံသား အများစုဟာ ဆင်းရဲကြတာမို့ မွေးဖွားလာတဲ့ မျိုးဆက်အဆင့်ဆင့်ဟာ အဟာရပြည့်ဝစွာ စားသုံးနေထိုင်နိုင်ခြင်း မရှိပါဘူး။ ဒါကြောင့် လူတွေဟာ သေးကွေးပိန်လှီလာပါတယ်။ အရပ်မြင့်ရာကနေ အရပ်ပုတဲ့ ဘဝကို ရောက်လာပါတော့တယ်။

အခုလို ဆင်းရဲတွင်းနက်နေတာဟာ ကြာသထက် ကြာနေဦးမယ်ဆိုရင်တော့ နောင်လာမယ့် မျိုးဆက်တွေဟာ အခု အရပ်ပု နေတယ်ဆိုတဲ့ မျိုးဆက်ထက် ထပ်ပြီးပုဖို့ရာပဲ ရှိပါတော့တယ်။ ကိုယ့်အမျိုးကို ကိုယ်ကိုတိုင် ကာကွယ်လို တယ်ဆိုရင် အရင်ဆုံးလုပ်ရမှာက ဆင်းရဲတွင်းက ရုန်းထွက်နိုင်ဖို့ ဖြစ်ပါတယ်။ ဆင်းရဲတွင်းက ရုန်းထွက်ဖို့ မှန်ကန်တဲ့ တရားမျှတတဲ့ လွတ်လပ်တဲ့ စီးပွားရေးစနစ်မျိုး ကျင့်သုံးဖို့ ထွန်းကားဖို့ လိုပါတယ်။ အမျိုးကို ကာကွယ်ဖို့ စာရွက်ပေါ်မှာ ဥပဒေပြုရုံနဲ့တော့ မြန်မာနိုင်ငံသားတွေ ဆင်းရဲတွင်းက ထွက်နိုင်မှာ မဟုတ်သလို၊ သန်မာထွားကြိုင်း မြင့်မားလာမှာ မဟုတ်ဘူးဆိုတာ သတိချပ်ဖို့ လိုပါတယ်။ သေးကွေးကြုံလှီပြီး အရပ်ပုနေတာဟာ ဆုတ်ယုတ်မှုသာ ဖြစ်ပါကြောင်း။

ဇော်မင်း
၁၅ ရက်၊ မေလ၊ ၂ဝ၁၄ ခုနှစ်

No comments:

 
 
©2007 Fine-Leaves.blogspot.com, Powered by Blogger.